Роден е 1985 година во Куманово. Дипломирал на Факултетот за електротехника и информациски технологии во Скопје во 2008 година на насоката Информатика и компјутерско инженерство. Магистрирал на истиот факултет во 2010 година на насоката Компјутерски мрежи и е-технологии, со магистерска теза од областа на семантички веб технологии. Во 2016 година докторирал на Факултетот за информатички науки и компјутерско инженерство, на насоката Компјутерски науки и инженерство, со докторска дисертација од областа на поврзани податоци. Во текот на студирањето континуирано е наградуван за успешно студирање.
На Институтот за компјутерска техника и информатика при Факултетот за електротехника и информациски технологии во Скопје работи од 2008 година како демонстратор. Во 2011 година е избран за помлад асистент на Факултетот за информатички науки и компјутерско инженерство, а во 2014 година за асистент. Во 2017 година е избран за доцент, а во 2022 година за вонреден професор на Факултетот за информатички науки и компјутерско инженерство. Неговите наставни обврски опфаќаат работа на предмети од областа на математика, оперативни системи, менаџмент информациски системи, безжични компјутерски мрежи и веб базирани системи.
Учествува/л во бројни меѓународни и домашни научно-истражувачки проекти. Во рамките на досегашната научно-истражувачка работа има објавено голем број научни трудови како автор и коавтор. Коавтор е на една книга. Негови активни полиња на научен интерес се поврзани податоци, графови на знаење, наука за податоци, отворени податоци и семантички веб технологии.
https://mjovanovik.com/