Целта на оваа студиска програма е да одговори на ова барање и да понуди образовани програмери кои се спремни за вклучување на пазарот на трудот. Брзиот развој во областа бара и соодветни измени и модификации на постоечките високо-образовни курсеви со цел во истите да се вклучат новите достигнувања но, и да се прилагодат на потребите на самата индустрија. Студиската програма вклучува практични курсеви кои се наменети да им овоможат на студентите да се стекнат со потребните вештини за дизајн, развој и тестирање на софтверски апликации. Истата обезбедува едукација на програмери кои не само што ќе можат да одговорат на потребите на брзо растечката софтверска индустрија туку ќе овозможат и нејзин понатамошен развој. За таа цел студиската програма ќе ги подготви студентите и за потребата за доживотно учење со што истите ќе може да ги следат сите измени во софтверската индустрија. Студиите се дизајнирани на начин кој овозможува на студентите кои успешно ќе ги завршат, да можат да продолжат и да се доедуцираат на некоја од останатите насоки на ФИНКИ со цел да може да стекнат повисок степен на образование.

Висок стручен програмер

Bachelor of Applied Science in programming (180 ECTS)

Во наставната програма е предвидено да има 22 задолжителни предмети, и 9 изборни предмети.
Сите изборни предмети се поделени во три групи на тежина (Н1, Н2 и Н3). Тежината е прикажана во кодот на предметите. Предмети што содржат L1 се предмети од група на тежина Н1. Предмети што содржат L2 се предмети од група на тежина Н2. Предмети што во кодот содржат L3, се предмети од група на тежина Н3. Правилата за изборност на предмети според нивото се дефинирани како:
• Број на предмети од Н1- вкупниот број кредити на избрани изборни предмети од групата Н1 не смее да надминува 6 кредити.
• Број на предмети од Н2- вкупниот број кредити на избрани изборни предмети од групата Н2 не смее да надминува 36 кредити.
• Број на предмети од Н3 – нема ограничување во бројот на избрани предмети од групата Н3.
• Предуслови за предметите не важат за оваа студиска програма.
Студентот може да избере и повеќе предмети од групата Н1 и групата Н2 од предвидениот број, но, во тој случај кредитите освоени за овие предмети не влегуваат во вкупниот број на кредити потребни за стекнување на дипломата. Студентот може да добие најмногу 6 ЕКТС кредити од екстракурикуларни активности одобрени од наставно научниот совет на факултетот. Положените предмети и освоените кредити ќе бидат дел од листата на положени предмети во уверението за положени предмети по завршување на факултетот.